ദുബായിലെ ഡ്രൈവറില്ലാ വാഹനങ്ങളുടെ പ്രവർത്തനം നിയന്ത്രിക്കാൻ പുതിയ നിയമം യു എ ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ചു.
ഡ്രൈവറില്ലാ വാഹനങ്ങൾ ഓടുന്ന റോഡുകൾ, പ്രദേശങ്ങൾ, റൂട്ടുകൾ എന്നിവയുടെ അതിർത്തി നിർണയിക്കുന്നതിനും അവയുടെ വേഗപരിധി നിശ്ചയിക്കുന്നതിനും അവയുടെ പ്രവർത്തനങ്ങളുടെ മറ്റ് വശങ്ങൾ കൈകാര്യം ചെയ്യുന്നതെല്ലാം റോഡ്‌സ് ആൻഡ് ട്രാൻസ്‌പോർട്ട് അതോറിറ്റി ആയിരിക്കും.
ഡ്രൈവറില്ലാ വാഹനങ്ങൾക്ക് ലൈസൻസ് നൽകാനും ആർടിഎയെ ചുമതലപ്പെടുത്തിയിട്ടുണ്ട്. ഡ്രൈവറില്ലാ വാഹനങ്ങളുമായി ബന്ധപ്പെട്ട ഏത് പ്രവർത്തനത്തിനും ആർടിഎയുടെ ഡയറക്ടർ ജനറലും ബോർഡ് ഓഫ് എക്‌സിക്യൂട്ടീവ് ഡയറക്ടർമാരും നൽകുന്ന ലൈസൻസ് നിർബന്ധമാണ്. ഡ്രൈവറില്ലാ വാഹനങ്ങളുമായി ബന്ധപ്പെട്ട പ്രവർത്തനങ്ങൾക്ക് ലൈസൻസ് ലഭിക്കുന്നതിനുള്ള വ്യവസ്ഥകളും നിയമം വ്യക്തമാക്കുന്നു. ഓട്ടോണമസ് വാഹനങ്ങളുടെ രജിസ്ട്രേഷനായുള്ള പ്രധാന ആവശ്യകതകൾ ആർടിഎയുടെ സാങ്കേതിക പരീക്ഷയിൽ വിജയിക്കുക, റോഡ് അടയാളങ്ങൾ വായിക്കാനുള്ള സാങ്കേതിക ശേഷി എന്നിവയാണ്.
ദുബായിൽ ഓട്ടോണമസ് വാഹനങ്ങളുടെ വിൽപനയും കൈമാറ്റവും അംഗീകൃത ഏജന്റുമാർ വഴി മാത്രമേ നടത്താവൂ. ഒരു ഓപ്പറേറ്ററിൽ നിന്ന് മറ്റൊന്നിലേക്ക് വാഹനങ്ങൾ കൈമാറുന്നതിന് ആർടിഎയുടെ മുൻകൂർ അനുമതി തേടണം. നിയമത്തിലെ വ്യവസ്ഥകൾ ലംഘിക്കുന്നവർക്ക് 500 ദിർഹം മുതൽ 20,000 ദിർഹം വരെ പിഴ ചുമത്തും, അതേ വർഷം തന്നെ ആവർത്തിച്ചുള്ള ലംഘനങ്ങൾ ഉണ്ടായാൽ അത് ഇരട്ടിയാക്കും. ലംഘനങ്ങൾക്ക് പരമാവധി പിഴ 50,000 ദിർഹം ആണ്.
