ദുബായിലെ “ആദ്യത്തെ സംയോജിത, സമഗ്രമായ കാൻസർ ആശുപത്രി” 2026-ൽ തുറക്കുമെന്ന് ദുബായ് കിരീടാവകാശിയും ദുബായ് എക്‌സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അറിയിച്ചു. തുറക്കാനിരിക്കുന്ന കാൻസർ ഹോസ്പിറ്റലിൻ്റെ രൂപകല്പന അനാച്ഛാദനം ചെയ്തുകൊണ്ടാണ് അദ്ദേഹം ഇക്കാര്യം അറിയിച്ചത്.
ദുബായ് ഹെൽത്തിൻ്റെ ഭാഗമായ ആശുപത്രിയുടെ ഡിസൈൻ അനാച്ഛാദനം ചെയ്യുന്ന ചടങ്ങിൽ നൂതനവും ആക്സസ് ചെയ്യാവുന്നതുമായ കാൻസർ പരിചരണം നൽകുന്നതിൽ ഒരു സുപ്രധാന ചുവടുവെപ്പ് അടയാളപ്പെടുത്തി, ദുബായ് ഹെൽത്ത് ഹംദാൻ ബിൻ റാഷിദ് കാൻസർ ഹോസ്പിറ്റൽ 2026 ൽ തുറക്കുമെന്നാണ് പ്രഖ്യാപിച്ചിരിക്കുന്നത്.
ദുബായ് ഹെൽത്തിൻ്റെ ദാന ദൗത്യത്തിന് നേതൃത്വം നൽകുന്ന അൽ ജലീല ഫൗണ്ടേഷനിലൂടെ ലഭിച്ച സംഭാവനകളുടെ സഹായത്തോടെയാണ് ഹംദാൻ ബിൻ റാഷിദ് കാൻസർ ആശുപത്രി വികസിപ്പിക്കുന്നത്. വ്യക്തികളുടെയും സംഘടനകളുടെയും കൂട്ടായ സംഭാവനകൾ 56,000 ചതുരശ്ര മീറ്റർ വിസ്തീർണമുള്ള ആശുപത്രി സ്ഥാപിക്കുന്നതിന് സഹായകമാകും.
ദുബായിയുടെയും ആരോഗ്യമേഖലയുടെയും ഭാവി കെട്ടിപ്പടുക്കുന്നതിനുള്ള വിലമതിക്കാനാകാത്ത സംഭാവനകളായി അവരുടെ പിന്തുണ എടുത്തുകാണിച്ചുകൊണ്ട് ആശുപത്രി പദ്ധതിക്കായി സംഭാവന നൽകിയ എല്ലാ ദാതാക്കൾക്കും ഷെയ്ഖ് ഹംദാൻ നന്ദി പറഞ്ഞു.
