ഷാർജയിൽ അൽ ദൈദ് ഇത്തിഹാദ് റെയിൽ സ്റ്റേഷനിലേക്ക് 3 പുതിയ ബസ് റൂട്ടുകൾ ആരംഭിച്ചു
അൽ ദൈദിലെ ഇത്തിഹാദ് റെയിൽവേ സ്റ്റേഷനിലേക്ക് യാത്രക്കാർക്ക് എളുപ്പത്തിൽ എത്തിച്ചേരുന്നതിനായി ഷാർജ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (SRTA) പുതിയ മൂന്ന് ഫീഡർ ബസ് റൂട്ടുകൾ പ്രഖ്യാപിച്ചു. അൽ മദാം, അൽ സജ, ഷാർജ (അൽ ജുബൈൽ) എന്നീ പ്രദേശങ്ങളെ അൽ ദൈദ് റെയിൽവേ സ്റ്റേഷനുമായി ബന്ധിപ്പിക്കുന്നതാണ് ഈ സർവീസുകൾ.
ER1 (അൽ മദാം ↔ അൽ ദൈദ് സ്റ്റേഷൻ): അൽ മദാം ബസ് സ്റ്റേഷനിൽ നിന്നുള്ള സർവീസ്. യാത്രാസമയം ഏകദേശം 1 മണിക്കൂർ.
ER2 (അൽ സജ ↔ അൽ ദൈദ് സ്റ്റേഷൻ): അൽ സജ ബസ് സ്റ്റേഷനിൽ നിന്നുള്ള സർവീസ്. യാത്രാസമയം ഏകദേശം 43 മിനിറ്റ്.
ER3 (അൽ ജുബൈൽ ↔ അൽ ദൈദ് സ്റ്റേഷൻ): ഷാർജ സിറ്റിയിലെ അൽ ജുബൈൽ ബസ് സ്റ്റേഷനിൽ നിന്നുള്ള സർവീസ്. യാത്രാസമയം ഏകദേശം 1 മണിക്കൂറും 42 മിനിറ്റും.
സെപ്റ്റംബർ 30-ന് ഇത്തിഹാദ് റെയിലിന്റെ പാസഞ്ചർ സർവീസ് ആരംഭിച്ചതോടെ ഷാർജയിലെ ആദ്യ റെയിൽവേ സ്റ്റേഷനായി അൽ ദൈദ് മാറിയിരുന്നു. ഈ സ്റ്റേഷൻ വഴി ഷാർജയെ ഫുജൈറ, അബുദാബി തുടങ്ങിയ എമിറേറ്റുകളുമായി ബന്ധിപ്പിക്കുന്നുണ്ട്.
പൊതുഗതാഗത സംവിധാനങ്ങൾ തമ്മിലുള്ള സംയോജനം മെച്ചപ്പെടുത്താനും യാത്രക്കാരുടെ യാത്ര കൂടുതൽ സുഗമമാക്കാനും ലക്ഷ്യമിട്ടാണ് ഷാർജ ആർ.ടി.എ ഈ ബസ് സർവീസുകൾ ആരംഭിച്ചിരിക്കുന്നത്.
