ദുബായ്: അബൂദബിയിലും ദുബായിലും പ്രവചിച്ചതിലും നേരത്തെ മഴയെത്തി. ശനിയാഴ്ച പുലർച്ചെയോടെ വിവിധയിടങ്ങളിൽ ഇടത്തരം ഇടിയോടുകൂടിയ മഴ ലഭിച്ചു. ഞായറാഴ്ച രാജ്യത്തിൻ്റെ ചില ഭാഗങ്ങളിൽ നേരിയ തോതിൽ മഴ തുടരുകയാണ്.
ദുബായിലെ ലഹ്ബാബ്, അൽ യുഫ്ര തുടങ്ങിയ പ്രദേശങ്ങളിലും അബുദാബി-അൽ ഐൻ റോഡിലും അബുദാബി, അൽ ഐൻ എന്നിവിടങ്ങളിലെ മറ്റ് ഭാഗങ്ങളിലും പുലർച്ചെ മുഴുവൻ നേരിയ തോതിൽ മഴ പെയ്യുമെന്ന് ദേശീയ കാലാവസ്ഥാ കേന്ദ്രം നിവാസികൾക്ക് മുന്നറിയിപ്പ് നൽകി.
ഇന്നത്തെ കാലാവസ്ഥ പൊതുവെ ഭാഗികമായി മേഘാവൃതമായിരിക്കുമെന്നും വിവിധ പ്രദേശങ്ങളിൽ മഴ പെയ്യുമെന്നും പ്രതീക്ഷിക്കുന്നതായി NCM വ്യക്തമാക്കി. രാജ്യത്തിൻ്റെ പർവത പ്രദേശങ്ങളിൽ താപനില 15 ഡിഗ്രി സെൽഷ്യസായി കുറയുമെന്നും ഉൾപ്രദേശങ്ങളിൽ ഉയർന്ന താപനില 37 ഡിഗ്രി സെൽഷ്യസിൽ എത്തുമെന്നും NCM ചൂണ്ടിക്കാട്ടി.
