അമ്പതോ അതിലധികമോ തൊഴിലാളികൾ ജോലി ചെയ്യുന്ന യുഎഇയിലെ സ്വകാര്യ കമ്പനികൾ ജൂൺ 30-നകം തങ്ങളുടെ അർദ്ധവാർഷിക സ്വദേശിവൽക്കരണലക്ഷ്യം കൈവരിക്കണമെന്ന് മന്ത്രാലയം ഇന്ന് മെയ് 21 ന് ഓർമ്മപ്പെടുത്തി.
50-ഓ അതിലധികമോ തൊഴിലാളികൾ ജോലി ചെയ്യുന്ന യുഎഇയിലെ സ്വകാര്യ കമ്പനികൾ ജൂൺ 30-നകം തങ്ങളുടെ എമിറാത്തി തൊഴിലാളികളെ 1 ശതമാനം വർധിപ്പിച്ചിരിക്കണം, മാനവ വിഭവശേഷി, എമിറേറ്റൈസേഷൻ മന്ത്രാലയം പറഞ്ഞു. ഇത് പാലിച്ചില്ലെങ്കിൽ ജൂലായ് 1 മുതൽ, മന്ത്രാലയം കമ്പനികളെ നിരീക്ഷിക്കുകയും പിഴ ചുമത്തുകയും ചെയ്യും.
2026-ഓടെ കുറഞ്ഞത് 10 ശതമാനത്തിലെത്താൻ രാജ്യത്തെ സ്വകാര്യ കമ്പനികൾ തങ്ങളുടെ എമിറാത്തി തൊഴിലാളികളുടെ ശതമാനം ഓരോ വർഷവും രണ്ട് ശതമാനം വർദ്ധിപ്പിക്കേണ്ടതുണ്ട്. വർഷത്തിന്റെ ആദ്യ പകുതിയിൽ ഒരു ശതമാനവും രണ്ടാം പകുതിയിൽ ഒരു ശതമാനവും വർദ്ധിപ്പിക്കണം. ഈ വർഷത്തെ ആദ്യ പകുതിയിൽ പാലിക്കേണ്ട മുന്നറിയിപ്പാണ് മന്ത്രാലയം ഇന്ന് നൽകിയിരിക്കുന്നത്.
