ദുബായിലുടനീളമുള്ള പെയ്ഡ് പാർക്കിംഗ് സോണുകളിൽ ഇലക്ട്രിക് വെഹിക്കിൾ (EV) ചാർജിംഗ് സ്റ്റേഷനുകൾ ആരംഭിക്കുമെന്ന് അധികൃതർ ഇന്ന് വെള്ളിയാഴ്ച പ്രഖ്യാപിച്ചു.
ഇതനുസരിച്ച് ദുബായ് ഇലക്‌ട്രിസിറ്റി ആൻഡ് വാട്ടർ അതോറിറ്റി (DEWA ) ദുബായിലെ പെയ്ഡ് പബ്ലിക് പാർക്കിംഗ് സൗകര്യങ്ങളുടെ ഏറ്റവും വലിയ വിതരണക്കാരായ പാർക്കിൻ നിയന്ത്രിക്കുന്ന “പ്രൈം ലൊക്കേഷനുകളിൽ” ഇവി ‘ഗ്രീൻ ചാർജർ’ സ്റ്റേഷനുകളുടെ എണ്ണം വിപുലീകരിക്കുന്നതിനുള്ള കരാറിൽ ഒപ്പുവച്ചിട്ടുണ്ട്.
ഇലക്ട്രിക് വെഹിക്കിൾ മേഖലയിൽ ധനസമ്പാദനത്തിനുള്ള സാധ്യതകൾ പര്യവേക്ഷണം ചെയ്യുകയാണെന്ന് പാർക്കിൻ നേരത്തെ പറഞ്ഞിരുന്നു. “ശുദ്ധ ഊർജ്ജ വാഹനങ്ങൾ റീചാർജ് ചെയ്യാൻ എടുക്കുന്ന സമയം കണക്കിലെടുക്കുമ്പോൾ, ഞങ്ങളുടെ പാർക്കിംഗ് സൗകര്യങ്ങൾ EV-കളിലേക്കുള്ള പരിവർത്തനത്തെ പിന്തുണയ്ക്കുന്നതിൽ ഒരു പ്രധാന പങ്ക് വഹിക്കും. ഞങ്ങളുടെ വിപുലമായ പാർക്കിംഗ് ശൃംഖല ചാർജിംഗ് സേവനങ്ങളിലേക്ക് എളുപ്പത്തിൽ ആക്‌സസ് നൽകുമെന്ന് പാർക്കിൻ അധികൃതർ പറഞ്ഞു.
2024 ഏപ്രിൽ അവസാനത്തോടെ, ദുബായിലെ ഇലക്ട്രിക് വാഹനങ്ങളുടെ എണ്ണം 30,000 കവിഞ്ഞതായി ദേവയുടെ എംഡിയും സിഇഒയുമായ സയീദ് മുഹമ്മദ് അൽ തായർ പറഞ്ഞു. “വരും വർഷങ്ങളിൽ ഈ എണ്ണം വർദ്ധിക്കുമെന്ന് പ്രതീക്ഷിക്കുന്നു. 2024 മാർച്ച് അവസാനത്തോടെ EV ഗ്രീൻ ചാർജർ സംരംഭത്തിൽ രജിസ്റ്റർ ചെയ്ത ഉപഭോക്താക്കളുടെ എണ്ണം 15,000 ആയി വർദ്ധിച്ചു.
