അബുദാബിയിൽ സീബ്രാ ക്രോസിങ് നിയമം പാലിക്കാതെ റോഡ് മുറിച്ചു കടന്ന മലയാളി വിദ്യാർഥി വാഹനമിടിച്ച് മരിച്ചു. കണ്ണൂർ പിലാത്തറ സ്വദേശിയും മോഡൽ പ്രൈവറ്റ് സ്‌കൂളിലെ ഏഴാം ക്ലാസ് വിദ്യാർഥിയുമായ ഷാസിൽ മഹ്‌മൂദ് ആണ് കഴിഞ്ഞ ദിവസം വാഹനമിടിച്ച് മരിച്ചത്.
വീടിന് സമീപമുള്ള ബസ് സ്‌റ്റോപ്പിൽ ഇറങ്ങിവീട്ടിലേക്കു പോകാൻ സീബ്രാ ക്രോസിങ് ഇല്ലാത്ത റോഡിലൂടെ കുറുകെ കടക്കവെ വാഹനം വന്ന് ഇടിക്കുകയായിരുന്നു. ഇടിയുടെ ആഘാതത്തിൽ ഷാസിൽ തൽക്ഷണം മരിച്ചിരുന്നു.
അബുദാബി ഡിഫൻസിൽ ഉദ്യോഗസ്‌ഥനായ എം.പി.ഫസലുറഹ്‌മാൻ്റെയും എമിറേറ്റ്സ് ഫ്യൂച്ചർ ഇന്റർനാഷനൽ അക്കാദമി അധ്യാപിക പി.ആയിഷയുടെയും മകനാണ്. സഹോദരൻ റിഹാം.
