സ്മാർട്ട് മൊബിലിറ്റി വ്യാപിപ്പിക്കുന്നതിനും സ്വയം നിയന്ത്രിത ഡ്രൈവിംഗ് സാങ്കേതികവിദ്യയുടെ ഉപയോഗം നിയന്ത്രിക്കുന്നതിനുമുള്ള അബുദാബിയുടെ ശ്രമങ്ങളുടെ ഭാഗമായി, ഇത്തരം വാഹനങ്ങൾക്കായി എമിറേറ്റിലെ ആദ്യത്തെ പ്രത്യേക ലൈസൻസ് പ്ലേറ്റുകൾ അവതരിപ്പിച്ചു.
‘സ്മാർട്ട് ആൻഡ് ഓട്ടോണമസ് സിസ്റ്റംസ് കൗൺസിലിന്റെ’ മേൽനോട്ടത്തിൽ, ഡിപ്പാർട്ട്മെന്റ് ഓഫ് മുൻസിപ്പാലിറ്റീസ് ആൻഡ് ട്രാൻസ്പോർട്ടിന്റെ കീഴിലുള്ള ഇൻ്റഗ്രേറ്റഡ് ട്രാൻസ്പോർട്ട് സെന്റർ (അബുദാബി മൊബിലിറ്റി) ആണ് ഈ പുതിയ ലൈസൻസിംഗ് സംവിധാനം കൊണ്ടുവന്നത്.
വാണിജ്യ സേവനങ്ങൾക്കായി ഉപയോഗിക്കുന്ന സ്വയം നിയന്ത്രിത വാഹനങ്ങളെയും പരീക്ഷണ ഓട്ടങ്ങൾക്കായി ഉപയോഗിക്കുന്ന വാഹനങ്ങളെയും തിരിച്ചറിയാൻ ഈ പുതിയ പ്ലേറ്റുകൾ സഹായിക്കും. ഇത് അധികൃതർക്കും മറ്റ് റോഡ് ഉപഭോക്താക്കൾക്കും അബുദാബിയിലെ റോഡുകളിൽ ഇത്തരം വാഹനങ്ങളെ എളുപ്പത്തിൽ തിരിച്ചറിയാൻ സൗകര്യമൊരുക്കുന്നു.
വാണിജ്യപരമായി സ്വയം നിയന്ത്രിത ഗതാഗത സേവനങ്ങൾ നൽകുന്ന വാഹനങ്ങളിൽ “Auto Drive” എന്ന് രേഖപ്പെടുത്തിയ ലൈസൻസ് പ്ലേറ്റുകളാണുണ്ടാവുക. എന്നാൽ പരീക്ഷണങ്ങൾക്കായി ഉപയോഗിക്കുന്ന വാഹനങ്ങളിൽ “Test” എന്ന് പ്രദർശിപ്പിക്കും. രണ്ട് വിഭാഗങ്ങളിലുമുള്ള പ്ലേറ്റുകൾക്കും സവിശേഷമായ നീല ഡിസൈൻ ആണുള്ളത്, ഇത് സ്വയം നിയന്ത്രിത വാഹനങ്ങളെ പെട്ടെന്ന് തിരിച്ചറിയാൻ സഹായിക്കുന്നു.
