ഷാർജയിലെ പക്ഷി-മൃഗച്ചന്തയ്ക്ക് സമീപം വളർത്തുമൃഗങ്ങളെ ഉപേക്ഷിക്കുന്ന സംഭവങ്ങൾ വർദ്ധിച്ചുവരുന്ന പശ്ചാത്തലത്തിൽ കർശന മുന്നറിയിപ്പുമായി ഷാർജ മുനിസിപ്പാലിറ്റി രംഗത്തെത്തി. മൃഗങ്ങളോടുള്ള ക്രൂരതയും നിയമലംഘനങ്ങളും അനുവദിക്കില്ലെന്ന് അധികൃതർ വ്യക്തമാക്കി.
പക്ഷി-മൃഗച്ചന്തയ്ക്ക് സമീപം വളർത്തുമൃഗങ്ങളെ ഉപേക്ഷിക്കുന്നത് ശ്രദ്ധയിൽപ്പെട്ടതിനെത്തുടർന്ന്, ഇത് നിയമവിരുദ്ധവും കാരുണ്യത്തിന് നിരക്കാത്തതുമാണെന്ന് അധികൃതർ ഓർമ്മിപ്പിച്ചു. കടയ്ക്ക് പുറത്ത് കൂട്ടിൽ മൃഗത്തെ ഉപേക്ഷിച്ചുപോകുന്ന കുട്ടിയുടെ ദൃശ്യങ്ങളും മുനിസിപ്പാലിറ്റി പുറത്തുവിട്ടിട്ടുണ്ട്.
മൃഗങ്ങളെ ഒഴിവാക്കാൻ ആഗ്രഹിക്കുന്നവർ മുനിസിപ്പാലിറ്റിയുടെ കോൾ സെന്ററായ 993-ൽ ബന്ധപ്പെടുക. ‘ഷാർജ കാറ്റ്സ് ആൻഡ് ഡോഗ്സ് ഷെൽട്ടറിൽ’ (Sharjah Cats and Dogs Shelter) സ്ഥലസൗകര്യം ലഭ്യമാണോ എന്ന് പരിശോധിച്ച് അപേക്ഷകൾ സ്വീകരിക്കുന്നതാണ്.
മൃഗങ്ങളുടെ സംരക്ഷണത്തിനായി ദുബായ് മുനിസിപ്പാലിറ്റിയും വർസാനിലെ പക്ഷി-മൃഗച്ചന്തയിലും അൽ ഖവാനീജിലും പ്രത്യേക ഷെൽട്ടറുകൾ (Shelters) സജ്ജീകരിച്ചിട്ടുണ്ട്. ഇവിടെ മൃഗങ്ങൾക്ക് ആവശ്യമായ വൈദ്യസഹായവും പരിചരണവും നൽകുകയും പിന്നീട് ദത്തെടുക്കാൻ (Adoption) സൗകര്യം ഒരുക്കുകയും ചെയ്യുന്നു.
അബുദാബിയിൽ വളർത്തുമൃഗങ്ങളുടെ സംരക്ഷണത്തിനായി കർശന നിയമങ്ങൾ നടപ്പിലാക്കിയിട്ടുണ്ട്. നായ്ക്കൾക്കും പൂച്ചകൾക്കും മൈക്രോചിപ്പ് ചെയ്ത് രജിസ്റ്റർ ചെയ്യേണ്ടതും, TAMM പ്ലാറ്റ്‌ഫോം വഴി പെറ്റ് ഓണർഷിപ്പ് സേവനങ്ങൾ നേടേണ്ടതും നിർബന്ധമാണ്. നിയമങ്ങൾ ലംഘിച്ചാൽ പിഴ ഈടാക്കും.
