അബുദാബിയിൽ ഭൂഗർഭ ഗതാഗത സംവിധാനങ്ങളും ടണലുകളും നിർമ്മിക്കുന്നതിനായി ഇലോൺ മസ്കിന്റെ പ്രശസ്തമായ തരംഗ വിപ്ലവ സംരംഭമായ ‘ദി ബോറിംഗ് കമ്പനി’യുമായി (The Boring Company) കൈകോർത്ത് അബുദാബി ഭരണകൂടം. നഗരത്തിലെ യാത്രാസൗകര്യങ്ങൾ മെച്ചപ്പെടുത്തുന്നതിനും നൂതനമായ അടിസ്ഥാനസൗകര്യ വികസനത്തിനുമായി ഇരുവിഭാഗവും കരാറിൽ ഒപ്പുവെച്ചു.
അബുദാബി പ്രോജക്ട്സ് ആൻഡ് ഇൻഫ്രാസ്ട്രക്ചർ സെന്ററും (ADPIC) ഇലോൺ മസ്കിന്റെ ‘ദി ബോറിംഗ് കമ്പനി’യും (The Boring Company) തമ്മിലാണ് ധാരണാപത്രത്തിൽ ഒപ്പുവെച്ചത്.
അബുദാബിയിലെ നഗര ഗതാഗതം, ഭൂഗർഭ യൂട്ടിലിറ്റി ടണലുകൾ, സുസ്ഥിര നഗര വികസനം എന്നിവയ്ക്കായി ടണൽ സാങ്കേതികവിദ്യയുടെ സാധ്യതകൾ വിലയിരുത്തുക എന്നിവയാണ് ഈ കരാറിൽ ലക്ഷ്യമിടുന്നത്.
നൂതന അണ്ടർഗ്രൗണ്ട് ടണലിംഗ് സാങ്കേതികവിദ്യകളുടെയും ഇൻഫ്രാസ്ട്രക്ചർ സൊല്യൂഷനുകളുടെയും പ്രാദേശിക കേന്ദ്രമായി (Regional Hub) അബുദാബിയെ മാറ്റാൻ ഈ സഹകരണം സഹായിക്കും.
‘LIVEX 2026’ എക്‌സിബിഷനിൽ വെച്ച് ADPIC ഡയറക്ടർ ജനറൽ മെയ്‌സറ മഹ്മൂദ് സലീം ഈദും ദി ബോറിംഗ് കമ്പനി പ്രസിഡന്റ് സ്റ്റീവ് ഡേവിസും തമ്മിലാണ് കരാർ ഒപ്പുവെച്ചത്.
