ദുബായ്: നവംബർ 22 ഞായറാഴ്ച യുഎഇയിലെ താമസക്കാർക്ക് തെളിഞ്ഞതും ഭാഗികമായി മേഘാവൃതവുമായ കാലാവസ്ഥ പ്രതീക്ഷിക്കാമെന്ന് യുഎഇ നാഷണൽ സെന്റർ ഓഫ് മെറ്റീരിയോളജി. രാജ്യത്തിന്റെ ചില ഉൾപ്രദേശങ്ങളിൽ ദൃശ്യപരത കുറയാൻ സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് എൻസിഎം നിർദ്ദേശിച്ചു. മൂടൽമഞ്ഞിന്റെ സാഹചര്യത്തിൽ എൻസിഎം റെഡ്, യെല്ലോ അലേർട്ടുകളും പുറപ്പെടുവിച്ചിരുന്നു.
രാജ്യത്തുടനീളം ചൂട് കൂടുതലായിരിക്കും, ദുബായ് ഉൾപ്പെടെയുള്ള ചില പ്രദേശങ്ങളിൽ മെർക്കുറി 31 ഡിഗ്രി സെൽഷ്യസ് വരെ ഉയരും. ദുബായിൽ ഉയർന്ന താപനില 31 ഡിഗ്രി സെൽഷ്യസും കുറഞ്ഞ താപനില 23 ഡിഗ്രി സെൽഷ്യസുമായിരിക്കും. അബുദാബിയിൽ പരമാവധി താപനില 30 ഡിഗ്രി സെൽഷ്യസും കുറഞ്ഞ താപനില 23 ഡിഗ്രി സെൽഷ്യസും ആയിരിക്കും. രാജ്യത്തിന്റെ ചില ഭാഗങ്ങളിൽ താപനില 18 ഡിഗ്രി സെൽഷ്യസ് വരെ താഴാം.
ചില തീരദേശ, ഉൾപ്രദേശങ്ങളിൽ രാത്രിയിലും തിങ്കളാഴ്ച രാവിലെയും ഈർപ്പമുള്ളതായിരിക്കുമെന്നും കാലാവസ്ഥാ നിരീക്ഷണ കേന്ദ്രം കൂട്ടിച്ചേർത്തു.






