നീന്തൽ പരിശീലകന്റെ ചുമതലയിലാക്കുന്നതിന് മുൻപ് കുട്ടികളെ നീന്തൽക്കുളത്തിന് സമീപം തനിച്ചാക്കി പോയതിനെ തുടർന്ന് കുട്ടി മുങ്ങിമരിച്ച സംഭവത്തിൽ സൂപ്പർവൈസറുടെ കുറ്റസമ്മതവും ശിക്ഷയും യു.എ.ഇ ഫെഡറൽ സുപ്രീം കോടതി ശരിവെച്ചു.
കേസിൽ കുറ്റക്കാരായി കണ്ടെത്തിയ രണ്ട് പേർക്കും (കൂടെപ്പോയ സൂപ്പർവൈസറും സ്വിമ്മിംഗ് പൂളിന്റെ ചുമതലയുണ്ടായിരുന്നയാളും) 1,000 ദിർഹം വീതം പിഴ ചുമത്തുകയും, ദിയാധനം (Blood Money) സംയുക്തമായി നൽകാൻ ഉത്തരവിടുകയും ചെയ്തു. ചുമതലകളിൽ വീഴ്ച വരുത്തുകയും ആവശ്യമായ സുരക്ഷാ മുൻകരുതലുകൾ എടുക്കുന്നതിൽ പരാജയപ്പെടുകയും ചെയ്തതിനാണ് പബ്ലിക് പ്രൊസിക്യൂഷൻ കേസ് എടുത്തത്.
കുട്ടികളെ ഒരു സ്പോർട്സ് ക്ലബ്ബിലോ കേന്ദ്രത്തിലോ എത്തിക്കുന്നത് കൊണ്ട് മാത്രം കൂടെയുള്ള ആളുടെ ഉത്തരവാദിത്തം അവസാനിക്കുന്നില്ലെന്ന് കോടതി വ്യക്തമാക്കി. കുട്ടികളെ കൃത്യമായി പരിശീലകന്റെ കൈകളിൽ ഏൽപ്പിക്കുകയും അവർ നീന്തൽക്കുളത്തിൽ സുരക്ഷിതരാണെന്ന് ഉറപ്പാക്കുകയും ചെയ്യുന്നതുവരെ മേൽനോട്ടക്കാരന് ഉത്തരവാദിത്തമുണ്ട്.
അപകടത്തിൽപ്പെട്ട കുട്ടിക്ക് മുൻപ് നീന്തൽ പരിചയമില്ലായിരുന്നുവെന്നും നീന്താൻ അറിയില്ലായിരുന്നുവെന്നുമുള്ള വസ്തുതയും കോടതി ചൂണ്ടിക്കാട്ടി. കുട്ടിയുടെ ഈ സാഹചര്യം പരിശീലകനെ മുൻകൂട്ടി അറിയിക്കാൻ സൂപ്പർവൈസർ ബാധ്യസ്ഥനായിരുന്നുവെന്നും കോടതി നിരീക്ഷിച്ചു.
