അനുകരണ വസ്തുക്കൾ സ്വർണ്ണമാക്കി വിൽക്കുന്ന ഏഷ്യൻ വംശജരായ 12 പേരടങ്ങുന്ന സംഘത്തെ അറസ്റ്റ് ചെയ്തതായി ഷാർജ പൊലീസ് അറിയിച്ചു.
കബളിപ്പിക്കപ്പെട്ടതായി നാട്ടുകാരിൽ നിന്ന് ഒന്നിലധികം പരാതികൾ ലഭിച്ചതിനെ തുടർന്നാണ് പോലീസ് അന്വേഷണം ആരംഭിച്ചത്. സംശയം തോന്നാതിരിക്കാൻ വിൽപ്പനയ്ക്കിടയിൽ മതിയായ ഇടവേളകൾ പാലിച്ചാണ് സംഘം തട്ടിപ്പ് നടത്തിയിരുന്നത്.
തുടക്കത്തിൽ കുറഞ്ഞ നിരക്കിൽ മൊബൈൽ ഫോണുകൾ വാഗ്ദാനം ചെയ്താണ് ഇവർ തട്ടിപ്പ് നടത്തിയത്. പിന്നീട് പ്രാദേശിക വിപണിയിൽ ലഭ്യമല്ലാത്ത ഇസ്‌ലാമിക ലിഖിതങ്ങളുള്ള ഒറിജിനൽ സ്വർണ്ണക്കഷണങ്ങളുടെ സാമ്പിൾ അവർ വാഗ്ദാനം ചെയ്തു. ആരെങ്കിലും സംശയിക്കുന്നുവെന്ന് ശ്രദ്ധയിൽപ്പെട്ടാൽ ഇവർ നിയമാനുസൃതമായ യഥാർത്ഥ സ്വർണ്ണക്കഷണങ്ങൾ അവരെ കാണിക്കും.
വാങ്ങുന്നവരെ ബോധ്യപ്പെടുത്തിക്കഴിഞ്ഞാൽ, അവർ അത് കുറഞ്ഞ വിലയ്ക്ക് വിൽക്കാൻ കരാർ ഉണ്ടാക്കും. എന്നിരുന്നാലും, വിതരണം ചെയ്ത വസ്തുക്കൾ വ്യാജമായിരുന്നുന്നെന്ന് ഇരകൾ പിന്നീട് മനസ്സിലാക്കി. ഈ ക്രിമിനലുകളെ നിരീക്ഷിച്ച് അവരുടെ രീതി പിന്തുടർന്നാണ് അന്വേഷണസംഘത്തിന് സംഘത്തെ പിടികൂടാനായത്.
അന്വേഷണത്തിൽ, വ്യാജ ഇനത്തിന്റെ വിതരണം, ഇരകളെ നിരീക്ഷിക്കൽ, വിലപേശൽ, വിൽപന പൂർത്തിയാക്കൽ തുടങ്ങിയ കുറ്റകൃത്യങ്ങൾ അവർ സമ്മതിച്ചു. സ്വർണ്ണം പൂശിയ ലോഹക്കഷണങ്ങൾ കയറ്റുമതി ചെയ്യാൻ രാജ്യത്തിന് പുറത്തുള്ള ആളുകളുമായി അവർ ആശയവിനിമയം നടത്തിയിരുന്നു.
എല്ലാവരും യഥാർത്ഥ ഔട്ട്‌ലെറ്റുകളിൽ നിന്ന് സ്വർണത്തിന്റെ ആധികാരികത പരിശോധിക്കാൻ അധികൃതർ അഭ്യർത്ഥിച്ചു.
