അൽ ഐനെ മൂടിയ മൂടൽമഞ്ഞ്, അബുദാബിയുടെയും ദുബായുടെയും ചില തീരപ്രദേശങ്ങളിൽ നേരിയ മൂടൽമഞ്ഞ് എന്നിവയോടെയാണ് ഇന്നത്തെ ദിവസം ആരംഭിച്ചത്. തിങ്കളാഴ്ച രാവിലെ, അൽഐനിൽ മൂടൽമഞ്ഞ് 1000 മീറ്ററിൽ താഴെ ദൂരക്കാഴ്ച കുറയാൻ കാരണമാകുമെന്ന് കാലാവസ്ഥാ നിരീക്ഷണ കേന്ദ്രം റെഡ് കാലാവസ്ഥാ മുന്നറിയിപ്പ് നൽകിയിരുന്നു.
അബുദാബി, ദുബൈ എന്നിവിടങ്ങളിലെ ചില തീരപ്രദേശങ്ങളിലും യെല്ലോ അലർട്ടും പ്രഖ്യാപിച്ചിരുന്നു. മൂടൽമഞ്ഞുള്ള കാലാവസ്ഥ രാവിലെ 9.30 വരെ തുടരുമെന്ന് നാഷണൽ സെന്റർ ഓഫ് മെറ്റീരിയോളജി അറിയിച്ചിരുന്നു.
കഴിഞ്ഞയാഴ്ച രാജ്യത്തിന്റെ ചില കിഴക്കൻ ഭാഗങ്ങളിൽ കനത്ത മഴയ്ക്കും ആലിപ്പഴ വർഷത്തിനും ശേഷം, ബുധനാഴ്ച മുതൽ ശനിയാഴ്ച വരെ, ഫുജൈറയിലും ഖോർഫക്കാനിലും പരിസര പ്രദേശങ്ങളിലും മേഘാവൃതമായ കാലാവസ്ഥ തുടർന്നു. ഈ പ്രദേശങ്ങളിൽ ഇന്ന് വീണ്ടും മേഘാവൃതമായ കാലാവസ്ഥയാണ് പ്രതീക്ഷിക്കുന്നത്. രാജ്യത്തിന്റെ മറ്റ് ഭാഗങ്ങളിൽ ഇന്ന് ആകാശം ഭാഗികമായി മേഘാവൃതമായി കാണപ്പെടും.
കഴിഞ്ഞ ആഴ്ചയും താപനിലയിൽ ഗണ്യമായ കുറവുണ്ടായി. എന്നാൽ, ഞായറാഴ്ച രാജ്യത്തുടനീളം താപനിലയിൽ ക്രമാനുഗതമായ വർദ്ധനവുണ്ടായി. ഇന്ന് മറ്റൊരു വർദ്ധനവ് പ്രതീക്ഷിക്കുന്നു, NCM പറഞ്ഞു.
ദുബായ്, ഷാർജ എന്നിവിടങ്ങളിലും രാജ്യത്തിന്റെ മറ്റ് തീരപ്രദേശങ്ങളിലും ഉച്ചയോടെ പരമാവധി താപനില 25 മുതൽ 30 ഡിഗ്രി സെൽഷ്യസിൽ എത്തും. രാജ്യത്തിന്റെ ആന്തരിക ഭാഗങ്ങളിൽ താപനില 30 മുതൽ 35 ഡിഗ്രി സെൽഷ്യസ് വരെ ഉയരും. കൂടാതെ, പർവതങ്ങളിൽ താപനില 17 മുതൽ 23 ഡിഗ്രി സെൽഷ്യസ് വരെ ആയിരിക്കും. ഏറ്റവും കുറഞ്ഞ താപനില 12 മുതൽ 18 ഡിഗ്രി സെൽഷ്യസ് വരെ ആയിരിക്കും.