ദുബായുടെ യഥാർത്ഥ മൊത്ത ആഭ്യന്തര ഉൽപ്പാദനം (GDP) വർഷത്തിന്റെ ആദ്യ പാദത്തിൽ 2.8 ശതമാനം വർധിച്ച് 111.3 ബില്യൺ ദിർഹത്തിലെത്തി. 2023 ലെ ഒന്നാം പാദത്തിലെ ശരാശരി ആഗോള വളർച്ചാ നിരക്കിനെയാണ് മറികടന്നിരിക്കുന്നത്.
വർഷത്തിന്റെ ആദ്യ പാദത്തിലെ തുടർച്ചയായ ഉയർന്ന വളർച്ച ദുബായിയുടെ ശക്തമായ അടിസ്ഥാനതത്വങ്ങളുടെയും സുസ്ഥിരതയുടെയും പ്രതിരോധശേഷിയുടെയും എന്റർപ്രൈസസിനും നവീകരണത്തിനും പുത്തൻ പാതകൾ നിരന്തരം സൃഷ്ടിക്കാനുള്ള കഴിവിന്റെയും മറ്റൊരു തെളിവാണിതെന്ന് ദുബായ് കിരീടാവകാശിയും എക്‌സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പറഞ്ഞു.
ദുബായുടെ സമ്പദ്‌വ്യവസ്ഥയെ ഇരട്ടിയാക്കാനുള്ള ദുബായ് ഇക്കണോമിക് അജണ്ട D33 ന്റെ അഭിലാഷ ലക്ഷ്യങ്ങൾക്ക് ഈ വളർച്ച സംഭാവന നൽകുന്നുവെന്നും അദ്ദേഹം പറഞ്ഞു.
