ഉമ്മുൽ ഖുവൈൻ തീരത്തുണ്ടായ എണ്ണ ചോർച്ചയെത്തുടർന്ന് മുൻകരുതൽ നടപടിയെന്ന നിലയിൽ ഷാർജയിലെ അൽ ഹംരിയ ബീച്ച് (Al Hamriya Beach) താൽക്കാലികമായി അടച്ചതായി ഷാർജ മുനിസിപ്പാലിറ്റി വെള്ളിയാഴ്ച അറിയിച്ചു.
ബീച്ചുകളുടെ സുരക്ഷ ഉറപ്പാക്കുന്നതിനും സമുദ്ര മലിനീകരണം തടയുന്നതിനുമായി പ്രത്യേക സംഘങ്ങൾ സ്ഥലത്ത് സജീവമായ പ്രവർത്തനങ്ങൾ നടത്തിവരികയാണെന്ന് അധികൃതർ വ്യക്തമാക്കി.
പൊതുസുരക്ഷ മുൻനിർത്തി മത്സ്യത്തൊഴിലാളികളും കടലിൽ പോകുന്നവരും കർശനമായ നിർദ്ദേശങ്ങൾ പാലിക്കണമെന്ന് അധികൃതർ അഭ്യർത്ഥിച്ചു.
ടാങ്കറിൽ നിന്നുണ്ടായ എണ്ണ ചോർച്ചയാണ് യു.എ.ഇയിലെ വിവിധ എമിറേറ്റുകളിൽ അനുഭവപ്പെട്ട ഇന്ധന ഗന്ധത്തിന് കാരണമെന്ന് കാലാവസ്ഥ വ്യതിയാന പരിസ്ഥിതി മന്ത്രാലയം (MOCCAE) നേരത്തെ സ്ഥിരീകരിച്ചിരുന്നു. ഉമ്മുൽ ഖുവൈനിലെ മുഴുവൻ ബീച്ചുകളും ഇതിനോടകം അടച്ചിട്ടുണ്ട്. ചോർച്ച നിയന്ത്രിക്കുന്നതിനും സമുദ്ര പരിസ്ഥിതി സംരക്ഷിക്കുന്നതിനുമുള്ള ശുചീകരണ പ്രവർത്തനങ്ങൾ പുരോഗമിക്കുകയാണ്.
