പ്രസവത്തെ തുടർന്ന് അന്തരിച്ച മുൻ ജീവനക്കാരി മർവ അഹ്മദ് അൽ അമീൻ ബഖീതിന്റെ കുടുംബത്തിന് പിന്തുണയുമായി ദുബായ് പോലീസ്. പ്രിയപ്പെട്ടവളെ നഷ്ടപ്പെട്ട കുടുംബത്തിന്റെ ബുദ്ധിമുട്ടുകൾ മനസ്സിലാക്കി, മർവയുടെ ഭർത്താവിനും ഇളയ സഹോദരിക്കും ദുബായ് പോലീസ് ജോലി വാഗ്ദാനം ചെയ്തു.
സെപ്റ്റംബർ 23-നാണ് അജ്മാനിലെ ആശുപത്രിയിൽ ഇരട്ടക്കുട്ടികളായ ഫഹദ്, ഫഹദ് എന്നിവർക്ക് ജന്മം നൽകിയതിന് പിന്നാലെ 36 കാരിയായ മർവ അഹ്മദ് അന്തരിച്ചത്. ഇത് കുടുംബത്തെ കടുത്ത പ്രതിസന്ധിയിലാക്കിയിരുന്നു.
ആശുപത്രി നടപടികൾ, സംസ്കാര ചടങ്ങുകൾ, മൃതദേഹം അജ്മാനിൽ നിന്ന് ദുബായിലേക്ക് മാറ്റുക എന്നിവയിൽ ദുബായ് പോലീസ് പൂർണ്ണ പിന്തുണ നൽകി. ഉയർന്ന ഉദ്യോഗസ്ഥർ കുടുംബത്തെ നേരിൽ കണ്ട് അനുശോചനം അറിയിക്കുകയും കുട്ടികളുടെയും കുടുംബത്തിന്റെയും കാര്യങ്ങൾ അന്വേഷിച്ചറിയുകയും ചെയ്തു.
മർവയുടെ പിതാവ് സർജന്റ് അഹ്മദ് അൽ അമീൻ ബഖീത് 1979 മുതൽ ദുബായ് പോലീസിന്റെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷനിൽ സേവനം അനുഷ്ഠിച്ചിട്ടുള്ള വ്യക്തിയാണ്. മൂന്ന് തലമുറകളായി ഈ കുടുംബത്തിന് ദുബായ് പോലീസുമായി ശക്തമായ ബന്ധമാണുള്ളത്. കുടുംബത്തിന്റെ സാമ്പത്തിക സ്ഥിരത വീണ്ടെടുക്കാൻ സഹായിക്കുന്നതിനാണ് പോലീസ് ഉദ്യോഗസ്ഥർ ഈ മാതൃകാപരമായ തീരുമാനമെടുത്തത്.
