ഹോർമുസ് കടലിടുക്കിൽ വാണിജ്യ കപ്പലുകൾക്ക് നേരെ ഇറാൻ നടത്തുന്ന ആക്രമണങ്ങളും ബഹ്റൈൻ, കുവൈത്ത് എന്നീ അയൽരാജ്യങ്ങൾക്ക് നേരെ തുടർച്ചയായി നടത്തുന്ന പ്രകോപനങ്ങളും കടുത്ത ആശങ്ക ഉണ്ടാക്കുന്നതാണെന്ന് യു.എ.ഇ പ്രസിഡന്റിന്റെ നയതന്ത്ര ഉപദേശകനായ ഡോ. അൻവർ ഗർഗാഷ് വ്യക്തമാക്കി.
മേഖലയിലെ സംഘർഷങ്ങൾ ലഘൂകരിക്കാനോ (De-escalation) കഴിഞ്ഞകാല യുദ്ധങ്ങളുടെയും തർക്കങ്ങളുടെയും അധ്യായങ്ങൾ അവസാനിപ്പിച്ച് മുന്നോട്ട് പോകാനോ ടെഹ്റാൻ (Tehran) ആഗ്രഹിക്കുന്നില്ല എന്നതിന്റെ വ്യക്തമായ തെളിവാണ് ഇറാന്റെ ഈ പുതിയ നീക്കങ്ങളെന്ന് അദ്ദേഹം കുറ്റപ്പെടുത്തി.
ബുധനാഴ്ച തന്റെ ഔദ്യോഗിക ‘എക്സ്’ അക്കൗണ്ടിലൂടെയാണ് അദ്ദേഹം ഈ നിലപാട് വ്യക്തമാക്കിയത്. ഹോർമുസ് കടലിടുക്കിലൂടെ കടന്നുപോയ സൗദി അറേബ്യ, ഖത്തർ എന്നീ രാജ്യങ്ങളുടെ വാണിജ്യ കപ്പലുകൾക്ക് നേരെയാണ് ഇറാൻ ആക്രമണം നടത്തിയത്.
ഗൾഫ് രാജ്യങ്ങളുടെ പരമാധികാരത്തെയും സുരക്ഷയെയും ബാധിക്കുന്ന ഇത്തരം ആവർത്തിച്ചുള്ള അധിനിവേശങ്ങൾ മേഖലയിലെ സമാധാനാന്തരീക്ഷം തകർക്കുമെന്നും, സമാധാനപരമായ ചർച്ചകൾക്ക് ഇറാൻ പ്രാധാന്യം നൽകുന്നില്ലെന്നും യു.എ.ഇ പ്രസ്താവനയിലൂടെ അടിവരയിടുന്നു.
