ഭക്ഷ്യസുരക്ഷാ മാനദണ്ഡങ്ങൾ ലംഘിച്ചതിനെത്തുടർന്ന് അൽ ദാഫ്രയിലെ പ്രമുഖ കാറ്ററിംഗ് സ്ഥാപനം അബുദാബി ഫുഡ് സേഫ്റ്റി അതോറിറ്റി അടപ്പിച്ചു.
അബുദാബി അൽ ദാഫ്ര മേഖലയിൽ CN-1515090 എന്ന ലൈസൻസ് നമ്പറിൽ പ്രവർത്തിക്കുന്ന ‘നോബിൾ കാറ്ററിംഗ് സർവീസസ്’ എന്ന സ്ഥാപനത്തിന്റെ പ്രവർത്തനമാണ് ADAFSA താൽക്കാലികമായി നിർത്തിവെപ്പിച്ചത്. അബുദാബി എമിറേറ്റിലെ 2008-ലെ രണ്ടാം നമ്പർ ഭക്ഷ്യ സുരക്ഷാ നിയമത്തിന്റെയും ബന്ധപ്പെട്ട അനുബന്ധ ചട്ടങ്ങളുടെയും ലംഘനം ചൂണ്ടിക്കാട്ടിയാണ് നടപടി.
മുൻപ് നടത്തിയ പരിശോധനകളിൽ കണ്ടെത്തിയ വീഴ്ചകൾ പരിഹരിക്കാൻ അവസരം നൽകിയിട്ടും സ്ഥാപനം ഫലപ്രദമായ തിരുത്തൽ നടപടികൾ സ്വീകരിച്ചില്ലെന്ന് അതോറിറ്റി വ്യക്തമാക്കി. ഉപഭോക്താക്കളുടെ ആരോഗ്യം സംരക്ഷിക്കുന്നതിനും ഭക്ഷ്യസുരക്ഷ ഉറപ്പാക്കുന്നതിനുമായി ഉടനടി ഇടപെടേണ്ട സാഹചര്യം ഉയർന്നുവന്നതിനാലാണ് ഭരണപരമായ ഈ അടച്ചുപൂട്ടൽ നടപടി.
കണ്ടെത്തിയ തകരാറുകൾ പൂർണ്ണമായും പരിഹരിക്കുകയും, അതോറിറ്റിയുടെ എല്ലാ നിയമപരമായ മാനദണ്ഡങ്ങളും പാലിക്കുകയും ചെയ്ത ശേഷമേ സ്ഥാപനത്തിന് ഇനി പ്രവർത്തനം പുനരാരംഭിക്കാൻ അനുമതി നൽകൂ.
