യുഎഇയിൽ കഴിഞ്ഞ ദിവസങ്ങളിൽ വ്യാപകമായി ക്ലൗഡ് സീഡിങ് നടത്തിയതായി കാലാവസ്ഥാ നിരീക്ഷണ കേന്ദ്രം (NCM) അറിയിച്ചു.
അന്തരീക്ഷത്തിൽ മഴമേഘങ്ങളുടെ സാന്നിധ്യം കണ്ടെത്തിയതിനെ തുടർന്ന് കഴിഞ്ഞ ദിവസങ്ങളിൽ കാലാവസ്ഥാ നിരീക്ഷണ കേന്ദ്രം (NCM) വിവിധ ഘട്ടങ്ങളിലായി ക്ലൗഡ് സീഡിങ് വിമാനങ്ങൾ ഉപയോഗിച്ച് മഴ ലഭ്യത കൂട്ടാനുള്ള ദൗത്യങ്ങൾ നടപ്പിലാക്കി. സ്വാഭാവിക മഴയുടെ തോത് വർദ്ധിപ്പിക്കുന്നതിനും, മേഘങ്ങളിൽ നിന്ന് ഭൂമിയിലേക്ക് പതിക്കുന്ന മഴത്തുള്ളികളുടെ അളവ് കൂട്ടുന്നതിനുമാണ് ഈ ദൗത്യങ്ങൾ സംഘടിപ്പിക്കുന്നത്.
അന്തരീക്ഷത്തിന്റെ ഉയർന്ന തട്ടിലുള്ള ന്യൂനമർദ്ദ പാത്തിയുടെ (Upper-air trough) സ്വാധീനം മൂലമാണ് യു.എ.ഇയുടെ വിവിധ ഭാഗങ്ങളിൽ നിലവിൽ ശക്തമായ മഴ ലഭിക്കുന്നത്. വേനൽച്ചൂടിന് വലിയ രീതിയിൽ ആശ്വാസമേകുന്ന പ്രകൃതിദത്ത മഴയ്ക്ക് ഒപ്പമാണ് അധികൃതർ സാങ്കേതിക വിദ്യ ഉപയോഗിച്ച് മഴയുടെ വ്യാപ്തി വർദ്ധിപ്പിച്ചത്.
