യു.എ.ഇയിലെ ഏറ്റവും ഉയർന്ന പർവ്വതനിരയായ ജബൽ ജെയ്സിൽ സാഹസിക വിനോദസഞ്ചാരികളെ ആകർഷിക്കുന്നതിനായി 80 കിലോമീറ്റർ ദൈർഘ്യമുള്ള ‘ഗ്രാൻഡ് ലൂപ്പ്’ (Grand Loop) ട്രെയ്ലും 5 ദിവസം നീളുന്ന ക്ലൈംബിങ് പാതയും ഒരുങ്ങുന്നു. റസൽഖൈമയിലെ മാസ്റ്റർ ഡെവലപ്പർമാരായ മർജാൻ ഗ്രൂപ്പാണ് (Marjan) ഈ വൻകിട ടൂറിസം പദ്ധതിക്ക് നേതൃത്വം നൽകുന്നത്.
ജബൽ ജെയ്സിലെ നിലവിലുള്ള പാതകളെയും പുതിയ ട്രെയ്ലുകളെയും ബന്ധിപ്പിച്ച് നിർമ്മിക്കുന്ന 80 കിലോമീറ്റർ ദൈർഘ്യമുള്ള ഫ്ലാഗ്ഷിപ്പ് റൂട്ടാണിത്. ഹൈക്കിംഗ്, ക്ലൈംബിങ്, ക്യാമ്പിംഗ്, സൈക്ലിംഗ് എന്നിവയ്ക്കായി ഒന്നിലധികം ദിവസത്തെ യാത്രകൾ സാധ്യമാകും.
വടക്കൻ റസൽഖൈമയിലെ മലനിരകളിലൂടെ 20 കിലോമീറ്റർ നീളത്തിൽ 4 ഘട്ടങ്ങളുള്ള 5 ദിവസത്തെ പുതിയ ‘വിയാ ഫെറാട്ട’ ക്ലൈംബിങ് റൂട്ട് വികസിപ്പിക്കുന്നു. കാൽനടയായി മാത്രം പ്രവേശിക്കാവുന്ന വിശ്രമ കേന്ദ്രങ്ങളും (Mountain shelters) ഇതിന്റെ ഭാഗമായുണ്ടാകും.
വാദി ഖമ്മെദ് – ഹിഡൻ ഒയാസിസ് (Wadi Khammed–Hidden Oasis) മേഖലയിലെ ട്രെയ്ലുകൾ നവീകരിക്കുന്നുണ്ട്. സുരക്ഷിതമായ സഞ്ചാരത്തിനായി പ്രൊഫഷണൽ ബോർഡുകളും ദിശാസൂചകങ്ങളും പ്രത്യേക മൗണ്ടൻ റെസ്ക്യൂ പിന്തുണയും ഉറപ്പാക്കും.
പ്രദേശത്തെ ജൈവവൈവിധ്യത്തെ സംരക്ഷിച്ചുകൊണ്ടാണ് നിർമ്മാണം. അജാസ് എൻവയോൺമെന്റ് കൺസൾട്ടന്റ്സ് നടത്തിയ പഠനത്തിൽ അറേബ്യൻ ചുവന്ന കുറുക്കൻ (Arabian red fox), കാട്ടുപൂച്ച, വന്യജീവികൾ ഉൾപ്പെടെ 45 തരം സസ്യവർഗ്ഗങ്ങളും 29 ഇനം പക്ഷികളും 8 ഇനം സസ്തനികളും ഇവിടെ രേഖപ്പെടുത്തിയിട്ടുണ്ട്.
