ഹോർമുസ് കടലിടുക്കിലൂടെ (Strait of Hormuz) സഞ്ചരിക്കുകയായിരുന്ന സിംഗപ്പൂർ രജിസ്ട്രേഷനുള്ള രണ്ട് ചരക്കുകപ്പലുകൾക്ക് നേരെ അജ്ഞാത പ്രൊജക്റ്റൈൽ ആക്രമണം ഉണ്ടായതായി സിംഗപ്പൂർ മാരിടൈം ആൻഡ് പോർട്ട് അതോറിറ്റി (MPA) സ്ഥിരീകരിച്ചു. ആക്രമണത്തിൽ ഒരു കപ്പൽ പൂർണ്ണമായി മുങ്ങി.
ഒക്ടോബർ 13-ന് ആക്രമിക്കപ്പെട്ട ഈ കപ്പലിൽ തീപിടുത്തമുണ്ടാകുകയും തുടർന്ന് കപ്പൽ മുങ്ങുകയും ചെയ്തു. കപ്പലിലുണ്ടായിരുന്ന 21 ജീവനക്കാരെയും സുരക്ഷിതമായി ഒഴിപ്പിച്ചു; ആർക്കും പരിക്കുകളില്ല.
ഒക്ടോബർ 14-ന് ആക്രമിക്കപ്പെട്ട രണ്ടാമത്തെ കപ്പലിന്റെ അടിത്തട്ടിന് (Hull) കേടുപാടുകൾ സംഭവിച്ചെങ്കിലും, സ്വന്തം എൻജിൻ സഹായത്തോടെ കപ്പൽ സുരക്ഷിതമായ ആങ്കറേജിൽ എത്തിച്ചു. ഇതിലുണ്ടായിരുന്ന 22 ജീവനക്കാരും സുരക്ഷിതരാണ്.
കപ്പലുകളിൽ സിംഗപ്പൂർ പൗരന്മാർ ആരും ഉണ്ടായിരുന്നില്ല. വാണിജ്യ കപ്പലുകൾക്ക് നേരെയുള്ള ഇത്തരം തുടർച്ചയായ ആക്രമണങ്ങൾ അന്താരാഷ്ട്ര നിയമങ്ങളുടെ ലംഘനമാണെന്നും അപലനീയമാണെന്നും എം.പി.എ (MPA) വ്യക്തമാക്കി.
