സൗദി അറേബ്യയിൽ ബാലിസ്റ്റിക് മിസൈലുകളും ബോംബ് നിറച്ച ഡ്രോണുകളും ഉപയോഗിച്ച് ബോധപൂർവവും വ്യവസ്ഥാപിതവുമായ രീതിയിൽ വിവിധ സ്ഥലങ്ങളിൽ സിവിലിയൻ വസ്തുക്കളെ ലക്ഷ്യമിട്ടുള്ള ഭീകര ഹൂത്തി മിലീഷ്യകളുടെ കഴിഞ്ഞ ദിവസമുണ്ടായ ആക്രമണങ്ങളെ യുഎഇ ശക്തമായി അപലപിച്ചു.
സൗദിക്കു നേരെയുണ്ടായ മിസൈല്‍, ഡ്രോണ്‍ ആക്രമണങ്ങളിലേറെയും സൗദി സഖ്യ സേന പരാജയപ്പെടുത്തിയിരുന്നു. എന്നിരുന്നാലും സിവിലിയൻ സൗകര്യങ്ങൾക്കും വീടുകൾക്കും സ്വകാര്യ സ്വത്തിനും നാശം വരുത്തി.
ഹൂതി മിലീഷ്യകളുടെ ഈ ആക്രമണങ്ങളുടെ തുടർച്ചയായ ഭീഷണി അന്താരാഷ്ട്ര സമൂഹത്തോടുള്ള അവരുടെ നഗ്നമായ അവഗണനയെ പ്രതിഫലിപ്പിക്കുന്നുവെന്ന് യുഎഇ വിദേശകാര്യ, അന്താരാഷ്ട്ര സഹകരണ മന്ത്രാലയം (MoFAIC) പ്രസ്താവനയിൽ പറഞ്ഞു.
യമന്‍ പ്രതിസന്ധിക്ക് പരിഹാരം കണ്ടെത്താനും ജനങ്ങളുടെ ദുരിതം അവസാനിപ്പിക്കാനും സൗദിയുടെ നേതൃത്വത്തില്‍ നടക്കുന്ന സമാധാന ശ്രമങ്ങളെ തിരസ്‌ക്കരിക്കുന്ന സമീപനമാണ് ഹൂത്തികളുടെ ഭാഗത്തു നിന്നുണ്ടായതെന്നും സഖ്യ സേന കുറ്റപ്പെടുത്തി. കഴിഞ്ഞ ശനി, ഞായര്‍ ദിവസങ്ങളില്‍ സൗദിയുടെ ജനവാസ കേന്ദ്രങ്ങളില്‍ ഉള്‍പ്പെടെ ഉണ്ടായ തുടര്‍ച്ചയായ ആക്രമണത്തിന് പിന്നാലെയാണ് ജിദ്ദയിലെ അരാംകോ എണ്ണ കേന്ദ്രം ആക്രമിക്കപ്പെട്ടത്.
അല്‍ ശഖീഖിലെ ജല ശുദ്ധീകരണ പ്ലാന്റ്, ജസാനിലെ അരാംകോയുടെ എണ്ണ കേന്ദ്രം, ദഹ്‌റാന്‍ അല്‍ ജുനൂബിലെ വൈദ്യുത കേന്ദ്രം, ഖമീസ് മുശൈത്തിലെ പെട്രോള്‍ സ്‌റ്റേഷന്‍, യാമ്പുവിലെ അരാംകോയുടെ ദ്രവീകൃത പ്രകൃതി വാതക കേന്ദ്രം എന്നിവ ലക്ഷ്യം വച്ചായിരുന്നു ഹൂത്തികളുടെ ആക്രമണം. എന്നാല്‍ ഇവയിലേറെയും ലക്ഷ്യത്തില്‍ എത്തുന്നതിനു മുമ്പേ സഖ്യ സേന പരാജയപ്പെടുത്തുകയായിരുന്നു.
