യുഎഇയിൽ വേനൽ കടുക്കുന്നതോടെ വരും ദിവസങ്ങളിൽ കടുത്ത ചൂടും ചില പ്രദേശങ്ങളിൽ താപനില 50 ഡിഗ്രി സെൽഷ്യസ് വരെ കടക്കാനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ഇതിനൊപ്പം അന്തരീക്ഷത്തിൽ ഈർപ്പത്തിന്റെ അളവ് (Humidity) കൂടാനും, രാജ്യത്തിന്റെ കിഴക്കൻ-മലയോര മേഖലകളിൽ ഇടയ്ക്കിടെ മഴ പെയ്യാനും സാധ്യതയുണ്ട്.
പല താമസക്കാരും ഉച്ചസമയത്തെ കടുത്ത ചൂടിൽ നിന്ന് രക്ഷപ്പെടാൻ തങ്ങളുടെ ദിനചര്യകളിൽ ഇതിനകം തന്നെ മാറ്റങ്ങൾ വരുത്തിത്തുടങ്ങിയിട്ടുണ്ടെങ്കിലും, ഈ വേനൽക്കാലത്തെ ഏറ്റവും ചൂടുകൂടിയ ആഴ്ചകൾ വരാനിരിക്കുന്നതേയുള്ളൂ എന്നാണ് കാലാവസ്ഥാ നിരീക്ഷകർ ചൂണ്ടിക്കാണിക്കുന്നത്.
രാജ്യം ഇതിനകം തന്നെ വേനൽക്കാലത്തേക്ക് കടന്നിട്ടുണ്ടെന്നും ഈ സമയത്ത് സാധാരണയായി ഉണ്ടാകാറുള്ള കാലാവസ്ഥയാണ് ഇപ്പോൾ അനുഭവപ്പെടുന്നതെന്നും എൻ.സി.എം ജനറൽ മെറ്റീരിയോളജി വിഭാഗം ആക്ടിംഗ് മേധാവി ഈസ അൽ സെറെയ്ദി പറഞ്ഞു. യു.എ.ഇയിൽ വേനൽക്കാലം ആരംഭിച്ചുകഴിഞ്ഞു. നിലവിൽ രാജ്യത്ത് ചൂടും ഈർപ്പവുമുള്ള കാലാവസ്ഥയാണ് അനുഭവപ്പെടുന്നത്. അതിനാൽ വരും മാസങ്ങളിലും താപനില ഉയർന്ന നിലയിൽ തന്നെ തുടരാനാണ് സാധ്യത,’ അദ്ദേഹം വ്യക്തമാക്കി.
ചില സമയങ്ങളിൽ താപനില 50 ഡിഗ്രി സെൽഷ്യസിന് മുകളിലേക്ക് ഉയർന്നേക്കാമെങ്കിലും, ഇത്തരത്തിലുള്ള കടുത്ത കാലാവസ്ഥ ദീർഘനാൾ നീണ്ടുനിൽക്കില്ലെന്നും അദ്ദേഹം കൂട്ടിച്ചേർത്തു. ‘ചില പ്രത്യേക ദിവസങ്ങളിൽ രാജ്യത്ത് 50 ഡിഗ്രിക്ക് മുകളിൽ താപനില രേഖപ്പെടുത്തിയേക്കാം. എന്നാൽ ഇത് ദീർഘനേരത്തേക്ക് ഉണ്ടാകില്ല. രാജ്യത്തിന്റെ പടിഞ്ഞാറൻ മേഖലകളിൽ (Western areas) ചൂട് വളരെ കൂടുതലായിരിക്കും.
കടുത്ത ചൂട് തുടരുമ്പോഴും ഈ ആഴ്ച യു.എ.ഇയുടെ ചില ഭാഗങ്ങളിൽ മഴ പെയ്യാൻ സാധ്യതയുണ്ട്.
പ്രാദേശികമായി ‘റവായേഹ്’ (Rawayeh) എന്നറിയപ്പെടുന്ന പ്രത്യേക കാലാവസ്ഥാ കാലയളവിലേക്ക് രാജ്യം കടക്കുന്നതിനാൽ, വെള്ളിയാഴ്ച വരെ രാജ്യത്തിന്റെ വിവിധ ഭാഗങ്ങളിൽ മഴമേഘങ്ങൾ രൂപപ്പെടാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു. ഇത് ഇടിയോടുകൂടിയ കാർമേഘങ്ങൾ (Convective clouds) രൂപപ്പെടുന്നതിനും, പലയിടങ്ങളിലായി ചിതറിപ്പെയ്തുള്ള മഴയ്ക്കും, ആഴ്ചാവസാനത്തോടെ താപനിലയിൽ നേരിയ കുറവുണ്ടാകുന്നതിനും കാരണമാകും.
മഴ പ്രധാനമായും രാജ്യത്തിന്റെ കിഴക്കൻ, മലയോര മേഖലകളിൽ മാത്രമായിരിക്കും കേന്ദ്രീകരിക്കുകയെന്ന് എൻ.സി.എം അധികൃതർ (Al Asray) ചൂണ്ടിക്കാട്ടി. ‘ചൊവ്വാഴ്ചയും ബുധനാഴ്ചയും മഴ പ്രതീക്ഷിക്കാം, വ്യാഴാഴ്ചയും മഴ പെയ്യാൻ സാധ്യതയുണ്ട്. അതിനുശേഷവും കുറച്ചു ദിവസങ്ങളിൽ മഴ തുടർന്നേക്കാം’ എന്നും അദ്ദേഹം വ്യക്തമാക്കി.
എന്നാൽ, പ്രധാന നഗരങ്ങളായ അബുദാബി, ദുബായ്, ഷാർജ എന്നിവിടങ്ങളിലെ കാലാവസ്ഥ ഇതിൽ നിന്നും തികച്ചും വ്യത്യസ്തമായിരിക്കും. ഇവിടെ ശക്തമായ മഴയ്ക്ക് പകരം ആകാശം മേഘാവൃതമായിരിക്കാനാണ് കൂടുതൽ സാധ്യത. ‘അബുദാബി, ദുബായ്, ഷാർജ തുടങ്ങിയ നഗരങ്ങളിൽ ശക്തമായ മഴ പെയ്തേക്കില്ല. എങ്കിലും, മേഘാവൃതമായ ആകാശത്തോടൊപ്പം നേരിയ ചാറ്റൽ മഴയ്ക്ക് (Light rainfall) ഇവിടെ സാധ്യതയുണ്ട്,’ അദ്ദേഹം കൂട്ടിച്ചേർത്തു.
