റാസൽഖൈമയിലെ പർവതപ്രദേശത്ത് സ്വദേശി യുവാവിനെ വീണ് മരിച്ച നിലയിൽ റാസൽഖൈമ പോലീസ് കണ്ടെത്തി. പർവതപ്രദേശത്തേക്ക് പിക്നിക്കിന് പോയ ഇയാൾ വീട്ടിലെത്താൻ വൈകിയതിനെത്തുടർന്ന് ബന്ധുക്കളും മറ്റ് നാട്ടുകാരും കൂടി പോലീസിൽ പരാതി നൽകുകയായിരുന്നു.
തുടർന്ന് റാസൽഖൈമ പോലീസ് അൽ റാമിലെ സമഗ്ര പോലീസ് കേന്ദ്രത്തിലെയും സെർച്ച് ആൻഡ് റെസ്‌ക്യൂ, നാഷണൽ ആംബുലൻസ് ഡിപ്പാർട്ട്‌മെന്റിലെയും അംഗങ്ങൾ അടങ്ങുന്ന ഒരു തിരയൽ ടീമിന് രൂപം നൽകുകയായിരുന്നു. ചില നാട്ടുകാരും തിരച്ചിലിൽ പങ്കുചേർന്നു. അവരിൽ പലർക്കും ഇയാൾ പോയ ഭൂപ്രദേശം പരിചയമുണ്ടായിരുന്നു.
തിരച്ചിലിനൊടുവിൽ ഒരു പരുക്കൻ പ്രദേശത്ത് ഇയാളെ ഉയരത്തിൽ നിന്ന് വീണ് മരിച്ച നിലയിൽ കണ്ടെത്തുകയായിരുന്നു. മൃതദേഹം പിന്നീട് ആശുപത്രിയിലേക്ക് മാറ്റി, സംഭവത്തെക്കുറിച്ച് ബന്ധപ്പെട്ട അധികാരികൾ അന്വേഷണം ആരംഭിച്ചിട്ടുണ്ട്.
